Di Conca

Surtitu da l’accinta di u fanali, piddà à manca dirizzioni Tizzà. À a cansa, piddà dinò à manca in dirizzioni di a torra di Senetosa è suvità u chjassu chì si ni codda par ghjunghja in 20 mn à u pedi di a torra.
Si passa davanti i picculi caseddi sfraiati è si suvita u chjassu sin’à un ciottulu ( ci hè spissu l’acqua drintu d’invernu è di branu ).
Francheti la par a dritta in dirizzioni di u ghjiru di Conca, u chjassu sirpintinu codda in cima di u Monti Lori par ghjunghja à a sarra di I Partusi, un oriu magnificu à dui stanzi. L’oriu hè una custruzzioni trugluditta tipica di a Corsica: muraddi à l’asseccu chjudani una furmazioni geulogica stunanti, u Tafonu, cantonu scavatu da l’irusioni micanica. U chjassu ghjunghji dopu à u caseddu di Conca.
Piddà a dirizzioni Conca par ghjunghja à un vechju caseddu rifattu, lacà u caseddu à dritta è andà par u chjassu chì va à a cala di Conca, passendu par una aghja antica. À a cala di Conca andà in fondu di u rinaghju à manca par ritruvà u chjassu litturali chì va in Sinitosa.
U chjassu s’avvicina à i ruvini di a Casa d’Ana, vechja casa chì era podarsi un granaghju è un locu da tena a farina. Si vedi sempri i vistighi di un furru è di una scalinedda sumirina. Si pò pinsà chì i prudutti agriculi partiani nant’à battedda accustati in a cala di Conca più inghjò.
Cuntinuà nant’à u chjassu litturali, dirizzioni u fanali di Senetosa, travirsà dopu a pianura di maredda par ghjunghja à a punta di Senetosa. Passà vicin’à u chjosu è ritruvà u chjassu par ghjunghja à l’intrata di u fanali.