I nosci chjassi

CAMINETI IN L’ORTU DI U VENTU

Parta da Tizzà o di Campumoru par entra in stu magnificu cunsirvatoriu di spazii è abitati naturali maritarranii. Suvità i passi di l’omini chì da l’ità di u Bronzu ani parcorsu è sfruttatu sti tarri. Essa libaru di caminà un ghjornu sanu, trà mari, machja è cantoni cù formi fantastichi. È scuntrà a merula trizinata ( o turchina) appuddata nant’à una petra ; u tarragnolu vulendu da i prati à l’aghjacci; u muscu di a murta è di maredda; l’aculi marini tucchendu guasgi u mari; i torri vardendu l’urizonti è i murraddi ch’ùn parini più finì.

Sti spazii prisirvati sò vivi è fragili, vi ringraziemu di rispittà a rigulamintazioni è d’ùn disturbà i pianti , l’animali è a paci di i loca. Ùn lacheti nisuna vistiga voscia.

Ricumindazioni pratichi

Da priveda: scarponi, acqua, è da pruteghjasi da u soli. Di vaghjimu è di branu, piddà arnesi più impurtanti, u tempu ancu beddu, pò cambià prestu.

Attenti à u focu : ùn n’andeti à spassighjà i ghjorna di vintera d’istati. Rinsignassi cù météo France.

Tél: 08 36 68 02 20 (0,34€ la minute)

Sti siti prutetti sò aparti à u pubblicu: par prisirvà l’aspettu naturali è a qualità di i siti, ci voli à rispittà i reguli. U camping, u bivaccu, a circulazioni di i vitturi è altri mezi di trasportu muturizzati fora di i pisti fatti apposta, i foca, u rumenzulu sò intardetti. I vardiani sò quì da fà rispittà sti reguli è vi poni dà infurmazioni.
Suviteti i segni…

Balisage Campomoro

I chjassi

DA U DUMINIU DI A TORRA DI CAMPUMORU

  • Si parti : da Bassa Torra
  • Tempu : da 20 mn à 1 ora

Nant’à u chjassu chì va à a torra di Campumoru, Antò, un vardianu di torra senza ità, porta tistimunianza, longu un chjassu d’intarpritazioni, di a so vita di Torregianu.
In calchi firmati, ci parla di l’orti di nanzi è di i muradda ammachjati, di i dastri insittati par a pruduzzioni d’oliu d’aliva, di i pastori è di i sgiò, di a leia stretta trà aghjenti è petra, di a pruduzzioni carbunara, è di u portu di cumerciu… Vera mimoria di u locu, v’invita à vultà tempi fà.
A marina di Campumoru, chjamata prima Port’Erice, spurtaia à l’epica ghjinuvesa, granu è altri prudutti versu Ghjenuva è si so prasidii.
A torra di Campumoru alzata in u 1586, in menu di un annu, dopu à l’abbottu di Sartè di 1583, chì hà vistu Hassan Pacha cù i so 2000 omini assaltà a cità è purtassi cintinai di paisani, hè a più massiccia di i torri di Corsica. Cù a so accinta furtificata cù l’angulu à u suddu pari una prua di batteddu, fù cuncipita com’è una piazza forti induva ci pudia stà una guarnighjona impurtanti. Una mostra permanenti drint’à a torra, conta st’epica disturbata di a storia di a Corsica.
Tamantu cuntrastu trà a parti urientali di a torra, induva, à l’ascosa, a machja cresci circendu u soli, è a parti à punenti vultatu versu u mari induva l’ aghjacci zuccati da u ventu t’ani a forma di u cappeddu è ùn ci sboccani à crescia. Versu a cala di i Ghjinuvesi, un cantonu chì pari un furonu, ci rendi curiosi. Stu segnu di a natura hè calcosa di stragnu, parchì si vedi spissi nutà à u largu di a Punta di Campumoru, bandi di furoni maiori è ancu certi cagnacci.

Pruminata è spassighjata di niveddu mizanu

  • Si parti : da Bassa Torra
  • Tempu : da 1ora è mezu à 5 ori sicondu u ghjiru sceltu.

Quì, machja nova, forza di l’elementi naturali, visti d’incantu è vistighi di a storia s’intricciani par fà risenta, in u soffiu di u libecciu, di u punenti o di u maistrali, a leia stretta trà natura è omini.
Longu à u vosciu parcorsu, nant’à sti chjassi chì suvitani i formi di sta costa
inzzicata, di sta natura spazzata, di sti cantoni zuccati, scuntrareti loca fantastichi chì cambiani sionti à i staghjoni, u tempu, o ancu a luminusità. In sta machja virdici, pien’à fiori, assicata spissu ma sempri risitanti à l’assalti di stu clima maritarraniu, sbuccani com’è tistimonii di u seculu andatu, elementi di picculi custruzzioni. Sò aghji, funtani, tarazzi è muraddi murati à l’asseccu, carbunaghjoli, caseddi chì lacani induvinà un attività agrupasturali impurtanti.

  • 1 ora è mezu : Ghjiru di i Pozzi
    Si parti: da Bassa Torra, pò si pidda u chjassu litturali trà prati, buschetti di murta è aghjacci…
  • 3 ori menu un quartu : Ghjiru di Canuseddu
    Si parti : da Bassa Torra si suvita u chjassu litturali sin’à u pianu di Canuseddu è piddà à manca par cuddà longu à a vadina...
  • 5 ori Ghjiru di Manna Mulina
    Si parti: da Bassa Torra, si pidda u chjassu litturali sin’à a Cala d’Acudda, ci voli à cuntà 2 ori è mezu…

u chjassu di u litturali

DA CAMPUMORU À TIZZÀ

  • Si parti : da Bassa Torra o Tizzà
  • Tempu : da 4 à 5 ori sionti u locu da indù si parta

A costa hè fatta quì di tanti picculi cali piattati in cori di una cantuniccia zuccata da l’acqua è da i venti, cù formi animali.
Partendu da Tizzà o da Campumoru, u chjassu litturali prupona un spittaculu naturali chi cambia tutti i ghjorna è dà à quiddu chì volta in u locu, u sintimu di una scuparta nova. Semu bè quì in a marina, ma a machja fala sin’à tuccà stu maritarraniu chì pò essa calmu, guasgi tostu, mutu o in furia, biancu, lampendu a so sciuma ancu nant’à i sarri.
In i tempi l’omu ùn ci staia vicinu à u mari, locu priculosu par via di l’invasori vinuti da tutti l’urizonti, è dopu parchì i pastori muntagnaiani in i caldamoni, purtendu i so bandi à pasci l’arba di l’alturi.
Oghji stu litturali piaci parchì hè statu pruttetu da omini è donni nati quì o nò.
Trà sti dui paisoli, com’è una magunia, un fanali, un fanali divintatu rifughju par l’omini, spassighjatori, scappendu i malanni di un mondu mudernu par ghjunghja in st’immensità induva sola lucichighja a so piccula fiaccula.


I GHJIRI DI SINITOSA

  • Si parti : da u rifughju di Senetosa
  • Tempu : Da 1 ora è mezu à 3 ori sionti u ghjiru sceltu

Storii di torri, quidda di u fanali, da privena da i priculi tutti i marinari passendu à u largu di Senetosa, o storia di una torra, quidda di Senetosa, da avvirtiscia i pupulazioni ch’iddi ghjunghjiani i tarribuli barbareschi.
U spaziu di Senetosa hè riccu di stu patrimoniu custruitu ch’iddu ci piaci à ritruvà parchì ci pari ch’iddu esista da sempri, da pò a nascita di u mondu o quidda di st’isula. Sti picculi custruzzioni sò tanti tistimonii di un attività agrupasturali tamanta in a vaddi di Conca, si parla ancu di mila foca di pupulazioni. Caseddi, orii, aghji, ribbi è muraddi murati à l’asseccu si vedini longu à u parcorsu, nant’à sti chjassi salvatichi parch’iddi sò prutetti.
A torra ghjinuvesa, una di l’ultima custruita nant’à u litturali corsu, in 1609, da avvirtiscia i pupulazioni di a scalata di certi pirati barbareschi hè stata alzata da Giovanni di Cavru. Vardata da un capu è dui suldati sin’à u 1713, hè data à u sirviziu di i Ponti in u 1857: l’archivi dicini ch’idda hè , tandu, « in ruvina in tutta ».
U fanali di Senetosa custruitu beddu tardu vistu u prugramma d’illuminazioni di a Corsica, si faci dopu à u naufragiu di u Tasmania. Hè statu cuncipitu da l’inginiori Zevaco. I travaddi ani cuminciatu in u 1889 è u fanali hè statu schiaritu u 15 di maghju 1892, cù u focu biancu incesu tutti i 5 sicondi. Hè da sassignalà a zecca di i Monachi è l’intrata à punenti di i bucchi di Bunifaziu.

  • 1 ora è mezu Ghjiru di Truonu e
    Si parti : da u fanali. Hè un accurtatoghju di u ghjiru di Conca. Dopu à a torra, à mani manca, un picculu viottulu v’avvia versu u chjassu di u litturali…
  • 3 ori Ghjiru di Conca
    Si parti: da u fanali. Si ghjunghji à u caseddu rifattu di Conca passendu par l’oriu di i Partusi…

Una spassighjata

DA BELVIDÈ À CAMPUMORU

Longu à u vechju stradeddu tradiziunali chì va da u paisolu nant’à a sarra, à a marina, u chjassu s’infrugna suttu à i licci è a machja vechja, franchendu i cantunicci. Una vista tremenda nant’à i costi pitricosi di l’Aliva è di l’Omu.