Campomoro - Senetosa
U rifughju di u FANALI di SENETOSA
v’accodda, par una nuttata o dui, in istanzi, stanza cumuna o sottutenda.
IN UN SITU NATURALI PRUTETTU DI A MARINA SARTINESA.
Parta nant’à i chjassi da Campumoru à Senetosa, par scopra tamantu cunsirvatoriu di loca è d’alloghji naturali di u maritarraniu.
Suvità i passi d’omini chì da l’ità di u Bronzu ani parcorsu è spluttatu sti tarri.
Essa libari di marchjà un ghjornu sanu, trà mari, machja è cantoni cù formi fantastichi. Più di 2300 ettari spartuti nant’à 20 chm di costi, sò, par sempri, prutetti da u Cunsirvatoriu di u Litturali è amministrati à seriu da u Sindicatu Elisa.
Un situ da pruteghja
Un mondu di granitu, di prati verdi piaghjinchi; à vista d’ochji a machja induva u ghjineparu marinu hè u rè. Chjassi da goda a paci è a tranquillità di i loca; u cantu aciarinu di a merula trizinata ( o turchina) ; un volu d’urtagni è di tarraghjoli chì si lampa nantà a murta ; u muscu putenti di a maredda è una biciartula chì faci a bedda. È si va da una torra ghjinuvesa à l’altra senza scuntrà stradi o custruzzioni.
Issi spazii sò vivi è fragili, vi ringreziamu di rispittà a rigulamintazioni, d’ùn tuccà à i loca, i fiori, l’animali, è d’ùn disturbà a so paci. Ùn lacheti micca vistighi vosci supralocu.
Ces espaces sont vivants et fragiles, merci de respecter la réglementation et de ne pas porter atteinte aux paysages, à la flore et à la faune et de pas troubler la tranquillité des lieux. Ne laissez aucune trace de votre passage.
U RIFUGHJU DI SENETOSA
Si pò ghjunghja à u fanali di Senetosa avà un rifughju, partendu da tanti paisoli à l’intornu, pà i chjassi di u liturali; accodda quiddi chì spassighjighjani à pedi, à cavaddu o cù i so kayaks, par una nuttata o dui.
A TORRA DI U CAMPUMORU
A torra di Campumoru cù a so accinta fatta da stedda, custruita à u XVI u seculu da i Ghjinuvesi hè à più massicia di i torri isulani. Drintu ci pudareti veda a mostra permanenti Barbareschi chì vi porta in i tempi pocu sicuri di i razzià, di i verri di corsa in u Maritarraniu è di a custruzzioni di i torri litturali.
Sindicatu Elisa
U situ prutettu di Campumoru Senetosa hè unu di quiddi maiori di l’isula è faci parti, guasgi tuttu di Natura 2000 ( par a tarra è u mari).
Da pò 25 anni stu situ hè u sindicatu intracumunali Elisa, cù a cullaburazioni di a CDC è di l’Uffiziu di l’Ambienti di a Corsica, chì hè in carica di a so prutizzioni, di u so sviluppu è di a so gistioni chì si pò cità in asempiu.
IN L’ORTU DI U VENTU
Par un uretta o una ghjurnata, sò stati appruntati tanti chjassi da scopra i loca. Ci si marchja bè, in armunia cù a natura. I chjassi suvitani i penditi naturali di u locu. Vi portani in cori di i pitrichicci di granitu, longu i vadini è a machja. U mari, l’urizonti, i margaddoni ciuffuti v’accumpagnani. Binvinuti in l’ortu di u ventu.