Campumoru-Senetosa

SPAZIU NATURALI PRUTETTU

À U SUDDU PUNENTI DI A CORSICA, I MARINI DI U SARTINESI…

… Hè nant’à sti costi d’una biddezza particulari ch’iddu s’hè fattu pocu à pocu da pò una quarantina d’anni, u situ naturali di Campumoru Senetosa.
U situ maiò di Campumoru Senetosa, prupiità di u Cunsirvatoriu di u Litturali, va da à punta di Campumoru , à u nordu, fin’à a punta di Senetosa, à u suddu, nant’à più di vinti chilometri è guasgi 2400 etarri induva s’intricciani patrimonii naturali è umani. A costa pitricosa hè inziccata monda: punti è scoddi si trovani à pari cù cali prufondi è stretti, cù picculi rinaghji. Da a parti interna si trovani cuddetti cuparti à machja, cù formi tonduli o inziccati. I graniti sfarenti marcani u locu. I più risistanti, i graniti leucucrati armani i sarri è i punti putenti. Più tennari, i munzograniti sò stati runzzicati tempu passendu.
20 000 anni fà, u mari, cù u niveddu più altu, hà frustatu sti cantoni, fenduni piani litturali com’è in Canuseddu è Arana. I vadini numarosi chì falani da i cuddetti ani scavatu ghjargali induva l’acqua, chì corri pocu d’istati, si pò fà grossa toccu u vaghjimu.
In stu locu tamantu, senza strada o urbanisazioni, i vistighi umani sò impurtanti, tistimunighjani d’una attività tremenda passata. Si trova caseddi, orii, aghji, funtani, stantari … I dui torri ghjenuvesi di Campumoru è Senetosa tenini à u nordu è à u suddu, i limiti di u duminiu di u Cunsirvatoriu. U fanali bianchicciu di Senetosa alza a so forma doppia nant’à u Capu di Senetosa. U Cunsirvatoriu di Corsica è l’Uffiziu di l’Ambienti di Corsica, ani apartu è accunciatu, mori chjassi chì portani i visitori à a scuparta di stu patrimoniu ecceziunali.

A strada hè stata longa, è mori sò stati quiddi chì si sò impignati par a prisirvazioni di sti loca : eletti, citadini, tecnichi, prupiitarii, scientifichi, artisti…Oghji u situ, par sempri prutettu, hè amministratu di manera suttili è attiva.

GISTIONI


Un situ classificatu di 1260 ettari, teni a parti norda di u situ, chì faci parti par u più di u reti Natura 2000 ( in tarra è in mari)
Da pò 25 anni stu situ hè prutettu, missu in valori, è a so gistioni asempiari hè fatta da u sindicatu tra cumunali ELISA, in cullaburazioni cù a Cullitività di Corsica.

I pianti

Vicinu à u mari, listinchi è murti, ciuffati da u ventu, sò accant’à l’aghjacci. I cuddetti vultati versu mari sò cuparti à una machja bassa induva si spanani a scopa, l’arbitru, a murta è l’aghjacciu, chì si poni truvà nant’à più di 500 ettari, ricuddendu versu l’internu. Nant’à i tarri povari si trovani u tangu cirvunu, u muchju o u spinirazzu. In l’internu, hè monda chì a machja s’hè francata da u focu . Hè più alta è l’isulotti di liccia ani crisciutu da pò seculi è seculi in i vaddi frischi o à pedi di i cantunicci. Nant’à i pianuri litturali, prati, avvinti da aghjacci, piattani pianti urighjinali o rari. Più o menu tocchi da a sciuma salita, sti prati sò pien’à acqua d’invernu: si facini tandu pozzi timpurarii cù a so vegetazioni cussì particulari. Vacchi insalvatichiti è signari, pascendu o rumendu, lacani puliti sti loca, chì a machja ùn pò invadiscia.

L’animali

In i cantunicci stani corbi tamanti è meruli trizinati (chjamati ancu turchini), rettili rimarchevuli com’è u petraghjolu è a tarentula. I prati di i pianuri litturali è i buschetti d’aghjacci sò friquintati da acciduchji, u tarragnolu, u fanettu, u virdonu, u verducellu, è a tarraghjula russiccia ( o passana).In i tafoni umidi si ripruducini i ruspi di i Baleari, a variulata è u ranichjinu. Drinti à i pozzi timpurarii di u maritarraniu ci sò tanti picculi crustacei chì ùn poni stà chì in sti spazii urighjinali. In a vadda agricula di Conca è a machja ci si trova a cuppulata (ditta d’Hermann).

I pozzi /puzzi timpurarii

U site di Campumoru Senetosa t’hà parechji pozzi timpurarii chì sò stati ripirturiati da l’Uffiziu di l’Ambienti di Corsica, cù l’aiutu di i vardi di u sindicatu.
sti picculi spazii umidi, annigati di manera periodica, sò un abitatu priuritariu di a direttiva habitas. Ci si campani certi pianti ( velata, illicebru verticillatu ) è , o anfibii.
I pozzi di Padduluccia sò stati ritinuti da i scientifichi di l’O.E.C par un prugrama righjunali di travaddu è di seguita par ciò chì tocca à i pozzi lucalizati in quid’altri siti di Corsica. Righi da misurà l’altezza di l’acqua sò stati missi in i quattru pozzi principali. I ‘aghjenti di Elisa facini tutti l’anni a rileva di sti misuri da u mumentu di l’annacquera fin’à u so assiccamentu, dui volti u mesi.I risultati sò trasmissi dopu à l’O.E.C è participighjani à u studiu di sti spazii beddi particulari.
Di più, in u 2010, una stazzioni meteò, stallata nant’à u situ, aiuta à studià a rilazioni trà i sfarenti fenomeni meteorologichi (acquati, venti, soli) è l’annacquera o l’assiccamenti di i pozzi.

Storia

TISTIMUNIANZI DI UNA CIVILISAZIONI

L’omu, ghjuntu in Corsica da pò omancu 9000 anni hà lacatu in u rughjoni, vistigi spittaculari di una civilisazioni di dui mila anni nanzi à a noscia epica.
L’omini di l’ità di u Bronzu aviani stallatu i so casi nant’à teppi o piani supranendu i vaddi. Sti casteddi erani furtificati par una o parechji accinti di petri da pruteghja a torra, idifiziu massiciu di forma circulara. Sti custruzzioni, nanzi tuttu difensivi, sirviani dinò par usi cautidiani. Mori stantari, stazzoni o bancali, sò tanti tistimonii di l’impurtanzi di l’arti è di i cridanzi di sta civilisazioni di i petri. Hè in Paddaghju, vicinu à Tizzà, ch’iddu si trova a quantità a più impurtanti di stantari di u spaziu maritarraniu.

U XVIu seculu fù una epica bughja par i cumunità isulani. I razzià di i pirati barbareschi vani sempri criscendu à cuntà da u 1530 fin’à 1570 è 1620, induva sò sprapusitati. I « turchi », chì viniani spissu da u Maghreb, erani maestri di i costi isulani. Paesi assaltati, casi è culturi sfatti, abitanti fatti prighjuneri…I tarri litturali si sò disertificati. Ghjenuva dicidi tandu di fà un ambiziosu prugrama di torri di surviglianzi è di difesa. Da 1530 à 1620, una cintinaia di torri funi alzati è pacati da i pupulazioni ubligati à pacà un impositu pà u sali. A dicisioni di custruiscia quidda di Portu Erice (vechju nomi di Campumoru), hè vinuta subitu dopu à l’abbottu di Sartè in 1583. In u 1586, dopu à un annu di travaddi, a più massiccia di i torri di Corsica fù finita. Una mostra in a torra di Campumoru, conta stu strattu di a storia di Corsica. A torra di Senetosa, fatta mori più tardi, hè una di l’ultimi edificati in Corsica, com’è quidda vicina di Roccapina, fatta da Giovanni di Cavru.
U fanali di Senetosa, iddu, conta un antra storia. U 17 d’aprili 1887, u Tasmania, batteddu à vapori di a Peninsular and Oriental Line, partitu da Bombay, si lampa nant’à i scoddi di i Monachi. I passaghjeri sarani tutti salvi, ma una parti di l’equipaghju, frà quali u capitanu, mori in st’assembru.
Stu naufraghju pidda impurtanza parchì u batteddu purtaia l’invitati à u ghjubileu di a regina Vittoria, c’era ancu u maharadjah Sir Portab Singh, incaricatu d’offra à a regina un baullu pienu à petri priziosi. I ghjuveddi funi salvati ma u cargamentu, avoriu, opium, indigò, cuttonu, sesama, peddi, spizzii, caffè, si ferma in fondu di u mari. A putenta Lloyd’s chì assicuraia u Tasmania, insistì parchì u guvernu francesi fessi custruiscia un fanali da assignalà i scoddi priculosi di I Monachi. In un cuntestu d’avvicinanza diplumatica trà l’Inguilterra è a Francia, u sirviziu di i Phares et Balises hè incaricatu di custruiscia lu à spicera. Eccu parchì, in u 1892, hè dighjà incesu u fanali di Senetosa. Urighjinali, hè u solu fanali di Francia cù dui torri: una par a lumera, a siconda par purtà un raghju russu fattu da assignalà di manera più pricisa I Monachi. Stu fanali in i tarri, solu nant’à a costa, senza strada da ghjunghji ci, dà à i so vardiani i cundizioni di una vita guasgi isulana: a rileva si faci dinò cù u batteddu. Sta situazioni particulari hà purtatu u Cunsirvatoriu di u Litturali à fà ni un rifughju litturali, u primu di Corsica.